Super Balita Cebu - Barrita: Way Catholic vote?

KADAGHAN na kita makadungog nga way Catholic vote. Bisan kon kinabag-an sa mga Pilipino mga Katoliko, wa pa sukad masukad masuta kon gisunod ba ang kagustohan sa simbahan sa pagpili og mga opisyal sa gobyerno matag eleksyon. Di sama sa ubang mga relihiyon nga usa lang ka sulti sa ilang labaw, mosunod ang tanan.

Sa Simbahang Katoliko, gihatagan ang mga sakop og free will o kaugalingong kabubut-on sa pagpili og mga opisyal. Di sila mapaig sa way kataposang kalayo sa impyerno kon di mopatuo sa gusto sa simbahan kon kinsay botohan.

Mao tingali kini ang hinungdan nga gipul-an na ang ubang mga haligi sa Simbahang Katoliko niining sigi pag-ingon nga way Catholic vote. Didto sa Bacolod City, si Bishop Vicente Navarra nipapilit sa atubangan sa San Sebastian Cathedral og dagkong mga tarpaulin nga naglista sa mga kandidato nga nipaluyo ug nisupak sa Reproductive Health Bill nga nahimong nang balaod, ang Responsible Parenthood (Reproductive Health) Law of 2012 (Republic Act No. 10354).

Kining maong balaod gisupak sa Simbahang Katoliko hangtod karon.

Ang pito ka mga kandidato sa pagkasenador nga nibotar sa pagpasar sa maong balaod gilista ubos sa “Team Patay.” Mao kini sila si Juan Edgardo Angara, Francis Escudero, Loren Legarda, Alan Peter Cayetano, Risa Hontiveros Baraquel, Teddy Casiño, and Jack Enrile.

Gibutang sab ubos sa “Team Patay” ang party-list groups nga Gabriela, Bayan Muna, Akbayan ug Anak Pawis.

Samtang ang unom ka mga kandidato pagkasenador nga nibotar supak sa pagpasar sa maong balaod gilista ubos sa “Team Buhay.” Mao kini sila si Joseph Victor Ejercito Estrada, Antonio Trillanes, Gregorio Honasan, Mitos Magsaysay, Koko Pimentel ug Cynthia Villar.

Apan nimando ang election officer sa Bacolod City nga ipatangtang ang maong mga tarpaulin kay nahisupak kini sa mga lagda sa Commission on Elections (Co­melec) sa gidak-on sa mga campaign materials, ilabi na sa mga tarpaulins.

Si Bishop Navarra nidangop sa Korte Suprema tungod kay matod pa ang mando sa Comelec nahisupak sa freedom of expression ug sa prinsipyo sa separation of church and state.

Niadtong Martes, niluwat ang Labawng Hukmanan og temporary restraining order (TRO) nga nagpugong sa Comelec sa pagtangtang sa mga tarpaulin sa simbahan sa Bacolod nga naglista sa Team Patay ug Team Buhay. Di kaha kini maghatag og kaisog sa ubang mga simbahan sa tibuok nasod sa pagbutang og susamang mga tarpaulin?

Ang simbahan di kandidato sa eleksyon. Nahi­lakip ba sila sa mga gidili sa Comelec atol sa eleksyon? Hain man ang mas bug-at, ang mga lagda sa Comelec o ang kagawasan sa usa ka tawo sa pagpagawas sa unsay anaa sa iyang huna-huna ingon man ang prinsipyo sa panagbuwag sa simbahan ug sa estado? Ato kining atangan.

(Ang atong paghisgut-hisgot mahitungod sa balaud madungog na matag karon ug unya sa mga tampo nga dunay punto legal ngadto sa tulomanon nga “Alang Kanimo Kapuso” nga gisibya  gikan sa ala-una ngadto sa alas dos sa hapon sa sibyaan DYSS Superadyo sa RGMA network.)